سنڌ قاصد (اخبار): هيءَ سنڌ مان نڪرندڙ ٽيون نمبر پراڻي اخبار هئي، جنهن جو پهريون پرچو 6 جون 1854ع تي جاري ٿيو. هيءُ اخبار انگريزي ۾ هوندي هئي، جيڪا اڱاري ۽ جمعي جي ڏينهن تي صبح واري وقت ۾ جاري ڪئي ويندي هئي. هن اخبار جي آفيس ڪراچيءَ ۾ نيپيئر روڊ تي هوندي هئي. ’سنڌ قاصد‘ جو پهريون ايڊيٽر اخبار جو مالڪ هينري جان برگس هو. جارج راڊ رج، وليم رولنڊ ۽ ڊي. پيريرا پريس جا انچارج رهيا. هن اخبار پنهنجي شروعات في صفحو چئن ڪالمن سان ڪئي، پر مختصر عرصي ۾ ترقي ڪري في صفحو پنج ڪالم شايع ٿيڻ لڳي. هن اخبار ۾ عام خبرن کانسواءِ سرڪاري نوٽيفڪيشن، تجارتي اشتهار، مزاحيه گيت، موسمي معلومات، آکاڻيون، اسٽيمرس ۽ پوسٽ جي آمد و رفت جون خبرون شايع ٿينديون هيون.
هن اخبار جي شروع ۾ قيمت ڇهه آنا هئي، پر پوءِ پهرين سيپٽمبر 1854ع تي اخبار جي سائيز وڌائڻ سبب قيمت به وڌائي اٺ آنا ڪئي ويئي. سنڌ قاصد ان دؤر جي ڪامياب اخبار هئي.